Date: 07 Márta 2025
Imeacht nua comhoibríoch a chothaíonn nasc idir gnónna turasóireachta i nDún na nGall
Bhí os cionn 100 gnó turasóireachta i nDún na nGall i láthair ag an chéad imeacht de chuid Nasc Turasóireachta a bhí ar siúl in Óstán an Mount Errigal i Leitir Ceanainn ar an Chéadaoin (5 Márta) i gcomhpháirtíocht le Fáilte Éireann, le Comhairle Contae Dhún na nGall agus le Turasóireacht Dhún na nGall. Bhí an láithreoir agus an t-iriseoir Richard Curann ina aoí speisialta ar an lá. Reáchtáladh an ócáid mar chuid de Sheachtain Fiontair Áitiúil Dhún na nGall 2025.
Is imeacht de chuid Nasc Dhún na nGall é seo ina bhfuil sé mar aidhm aige naisc fhiúntacha a chothú idir dreamanna a bhfuil baint acu leis an turasóireacht sa chontae. Beifear ag roinnt eolais, i mbun comhpháirtíochta agus ag roinnt nósanna nuálaíochta lena chéile. Táthar ag iarraidh go gcuirfí eispéireas den scoth ar fáil do thurasóirí, go gcuirfí cúrsaí turasóireachta chun cinn i rith na bliana agus go mbeadh líon cothrom turasóirí ag tarraingt ar na limistéir éagsúla i nDún na nGall. Is deis í seo do ghnónna áitiúla oibriú as lámha a chéile le léiriú go bhfuil Dún na nGall ina phríomhláthair turasóireachta agus gur áit ionchuimsitheach agus inbhuanaithe é ó cheann ceann na bliana.
Rinne Fáilte Éireann taighde le gairid le comóradh a dhéanamh ar 10 mbliana de Shlí an Atlantaigh Fhiáin agus thug an taighde le fios go bhfuil €3billiún den teacht isteach gach bliain ag teacht ó Shlí an Atlantiagh Fhiáin agus amach anseo, beifear ag díriú go mór ar thurasóirí a mhealladh i dtreo na slí turasóireachta ó thuaidh ina bhfuil Dún na nGall, ó thús deireadh na bliana.
