Date: 31 Márta 2025
Dún na nGall le Chéile - An tSeachtain um Ionchuimsiú Sóisialta i nDún na nGall Seolta
Seoladh An tSeachtain um Ionchuimsiú Sóisialta i nDún na nGall 2025, ar an Aoine 28 Márta in Amharclann an Ghrianáin agus tús curtha le seachtain cheiliúrtha ar éagsúlacht, ar chomhoibriú pobail, agus ar chuimsiú ar fud Dhún na nGall.
Is imeacht í An tSeachtain um Ionchuimsiú Sóisialta a mbíonn daoine ag súil léi gach bliain. Tugann sí ardán tarraingteach, oideachasúil agus cumasaithe do ghrúpaí pobail agus deonacha, do sheirbhísí, d’oideoirí agus do dhaoine aonair as gach cearn de Dhún na nGall, an obair ríthábhachtach a dhéanann siad le cuimsiú a chur chun cinn agus le tacú le pobail éagsúla, a léiriú.
Ag labhairt dó ag an seoladh, dúirt Leas-Phríomhfheidhmeannach Chomhairle Contae Dhún na nGall, Liam Ward: “Tugann An tSeachtain um Ionchuimsiú Sóisialta an deis dúinn béim a chur ar an obair mhór mhaith atá ar bun ag na hearnálacha poiblí agus pobail, leithcheal, bochtaineacht, agus eisiamh sóisialta a laghdú. Is deis atá ann le machnamh a dhéanamh ar na dúshláin atá le sárú ag baill leochaileacha den phobal, go háirithe le linn na saolta éiginnte seo.”
Bhí Cabaret Idirchultúrtha ar siúl in ndiaidh an tseolta, an chéad cheann de shraith atá á reáchtáil ag Seirbhís Ealaíne Chomhairle Contae Dhún na nGall le tacaíocht ón Chlár Éire Ildánach. Déanann siad ceiliúradh ar an éagsúlacht shaibhir ealaíne atá ar fud Dhún na nGall agus ar fud na tíre. I measc na léirithe a bhí ann, bhí damhsa de chuid na hIndia, an focal labhartha ó mhór-roinn na hAfraice, traidisiún scéalaíochta na hÉireann, agus an phríomh-mhír – Dagogo Hart.
Sheol Cathaoirleach Chomhairle Contae Dhún na nGall, an Clr Niamh Kennedy clár na seachtaine go hoifigiúil agus dúirt: “Tá réimse iontach imeachtaí beartaithe mar chuid den tSeachtain um Ionchuimsiú Sóisialta i nDún na nGall, a oireann do gach cumas agus aois. Cuirtear béim ar an obair thábhachtach agus luachmhar atá ar bun go háitiúil anseo i nDún na nGall, ar bhonn leanúnach. Ní hamháin go labhraíonn muid faoi Ionchuimsiú Sóisialta – maireann muid leis agus tógann muid air le chéile.”
Beidh imeachtaí na bliana seo ar siúl ó 28 Márta go 5 Aibreán, ina mbeidh ceiliúradh cultúrtha, traenáil gharchabhrach, taispeántais agus tionscadail folláine.
Moltar do gach duine:
- Súil a chaitheamh ar chlár iomlán na seachtaine:👉 An clár le fáil anseo
- Freastal ar na himeachtaí le linn na seachtaine agus cuireadh a thabhairt do dhaoine eile a bheith páirteach ann
- Cuimsiú a chur chun cinn ar na meáin shóisialta trí úsáid a bhaint as an haischlibeanna #DúnnanGall #DoChomhairle #DúnnanGallleChéile #SeachtainumIonchuimsiúSóisialta2025
Tá béim mhór curtha ar na Caiféanna Folláine mar chuid de chlár na bliana seo. Bíonn siad ar siúl ar fud Dhún na nGall gach seachtain. Cuirtear spás sábháilte neamhfhoirmiúil ar fáil do dhaoine chun buaileadh isteach, comhrá agus ceangal a chothú le daoine cairdiúla — agus sin bun agus barr an cheiliúrtha seo.
Le hionchur ó eagraíochtaí ar fud an chontae agus comhordú le hAonad um Ionchuimsiú Sóisialta Chomhairle Contae Dhún na nGall, is ábhar bróid í an tSeachtain seo a léiríonn na féidearthachtaí atá ann nuair a thig pobail le chéile chun a chinntiú go mothaíonn gach duine mar chuid dá phobal féin.